الي أن نلتقي

قبل ما أدخل في الموضوع عايزاكم تباركوا لي بقيت مراسله في الجزيره توك ياريت تقروا مواضيعي هناك وتقولوا رأيكم

بصراحه ماكنتش أتخيل أن ممكن ييجي يوم أضطر أوقف المدونه فيه

حتي في رمضان ماسبتش المدونه لأني اعتبرت ان ده نوع من أنواع الجهاد وكتبت تدوينه أنقض فيها اللي وقفوا المدونات باسم

أنا هكتب علي جدران النت

انما حصل شئ سئ للأسف هيخليني أتوقف عن التدوين في الوقت الحالي وباذن الله هكمل في الصيف لأني مقدرش أسيب المدونه علي طول

درجات التيرم ظهرت ومش قادره أقولكم علي الصدمه اللي أنا فيها الدرجات سيئه لدرجه مرعبه اللي يشوف الدرجات دي يقول صاحبتها ماتعرفش حاجه عن الطب

أنا في حالة اكتئاب فظيعه وخايفه جدا أنا رسبت في سنه قبل كده وأهلي خلاص مش هيقبلوا أقل من جيد جدا

أنا عارفه ان المدونه مش هي السبب بس أنا هبطل أكتب دلوقتي لاكتر من سبب

أولا :مش عايزه حد يلوم ارتباطي بالمدونه ويشوف انه السبب ومعظم اللي عارفني فاكرين ان هي السبب بس أنا عارفه ان هي الحاجه الوحيده اللي كانت بتخلي عندي أمل بس هضطر أقفلها

ثانيا:مفيش وقت خالص هبدأ امتحانات في شهر ابريل وطبعا انتم عارفين كلية الطب قاتله وماينفعش فيها مذاكرة اخر شهر لازم أكون مذاكره كويس من الاول

ثالثا:وهو ده السبب الاهم اني كان ممكن أفضل اكتب في المدونه بس كنت للأسف مش هقدر أرد علي التعليقات ولا حتي أزور المدونات الاخري وانا اكتر حاجه بتضايقني لما ألاقي حد عامل كده

المدونه دي للتواصل ولو مقدرتش أتواصل يبقي أنتظر الي ان يأتي وقت أستطيع التواصل فيه مع غيري من المدونيين

صعب جدا عليا أني أكتب الكلام ده بس فعلا مضطره جدا

مش هقدر أوفق بين المذاكره والمدونه وخاصة في الفتره دي لأن السنه دي أصعب وأقصر سنه في كلية الطب وبيسموها عنق الزجاجه يعني لو ربنا كرمني فيها هتفرق جدا معايا بعد كده

أرجوكم أدعولي جدا أنا محتاجه الدعاء قوي

لو كتبت هيبقي في الجزيره توك مش عشان هي أهم بس علشان مفيهاش تواصل بنفس درجة المدونه فمتابعتها هتبقي أقل

باذن الله أول ماهخلص الامتحانات هزور كل مدونات اخوتي وأخواتي لن المدونات هتكون وحشتني جدا

انتظروني في الصيف باذن الله