هاكتب علي جدران النت

بصراحه في اليومين اللي فاتوا كنت حاسه اني جالي اكتئاب وحسيت اني مش عارفه اكتب حاجه او مش عايزه اكتب حاجه

والسبب

ان بعض من المدونيين الكرام قرروا التوقف عن التدوين خلال شهر رمضان الكريم

في الاول كده كل سنه وانتم طيبين وباذن الله يكون رمضان ده بداية طريق النصر للمسلمين

نيجي بقي للمشكله

لما قرر بعض المدونيين التوقف عن التدوين خلال رمضان عشان رمضان ده شهر عباده ومش عايزين نضيع وقت في التدوين

بصراحه انا صدمت والكلام شككني في نفسي وفي اللي بعمله في المدونه اصل لو حد حاسس انه بيعمل حاجه تضيع الوقت او مش مهمه قوي فده يبقي في كل الاوقات مش رمضان بس لان قيمة الوقت مهمه وغاليه في كل الشهور

انا فضلت اراجع نفسي واقول طب ايه هدفي من التدوين والناس اللي داخله تدون هدفهم ايه منه

انا قبل ماابدأ تدوين اللي تزامن مع انضمامي للاخوان ماكنتش بعمل حاجه خالص يعني كل اللي اعمله اني انصح واحده صاحبتي او اتبرع بفلوس غير كده ماكانش ليا اي نشاط من اي نوع

طبعا اللي انا كنت فيه ده اتسببلي فعلا في اكتئاب وكنت فاشله في الدراسه لاني حسيت اني ماليش لازمه ومش بخدم الدين بحاجه

لما عرفت التدوين حسيت اني في طريقه اقدر بيها علي الاقل اني اقول رأيي اني اتضامن ولو روحيا مع ناس احسن مني كتير ناس بتجاهد فعلا سواء هنا في مصر او في اي منطقه محتله بالخارج ولو ان انا مش شايفه اختلاف كبير بيننا وبينهم نفس الذل والاهانه والاحساس بالغربه في ارضنا

كمان انا لم اكتف بان انا ادون واكتب وخلاص انما انا انضميت للاخوان .انا مش بشكر فيهم ولا بقول ان اللي يبقي معاهم يبقي خلاص ضمن الجنه وانما انا قصدي انهم وسيله رائعه لخدمة الدين بفاعليه. وابقي مع اللي بيغيروا بجد واللي مستعدين يضحوا بارواحهم عشان الفكره بتاعتهم مش مجرد واقفه بعيد اتفرج .طبعا انا مش زيهم واقل منهم ولكن بحاول اتعلم

الاخوان بالنسبه لي وسيله مش هدف

والتدوين بالنسبه لي طريقه لعرض افكاري واني اقول اللي انا حاساه وعايشاه واني ادافع عن قضيه انا امنت بيها

التدوين بالنسبه لي نوع من انواع الجهاد وهو جهاد اني اقول كلمة حق في وجه امام جائر

انا مش عامله المدونه عشان عندي وقت فراغ مش عارفه اعمل بيه ايه بالعكس كلية الطب صعبه جدا وانا داخله سنه تالته واي حد يعرف حاجه عن الطب هيعرف الي اي مدي السنه صعبه وبعد النجاح الهزيل اللي عملته السنه دي فانا اتمني اني احقق نجاح كبير عشان الهدف اللي عايزه اوصل له مش هيقبل بغير المتميزين ده غير ان اهلي فصلوا النت من البيت وبعد كده مش هاكتب الا من سيبرات يعني تعب ووجع قلب

انا كمان مش عامله المدونه عشان اتعرف علي شباب او اعمل حاجات مش هجرؤ اعملها امام الناس

وكمان مش عاملاها عشان اتكلم وخلاص علي اساس انه كلام لتفريغ ما اشعربه بدون اي هدف من اللي بكتبه

انا عامله المدونه دي عشان القضيه اللي انا مؤمنه بيها لازم نعمل عشانها اي حاجه وانا ماكنتش في غني قارون وسلطة فرعون وتركت كل الفلوس والسلطه ودخلت اعمل مدونه يا عالم مين هيقراها او يدخل عليها

ربنا اكثر من يعلم انه لم يكن في مقدرتي غيرها وان هي دي الحاجه الوحيده اللي اقدر انشر بيها افكاري وقضيتي بجانب العمل مع الاخوان مباشرة مع الناس

ممكن حد من اللي عاملين مدونه لما يقرأ الكلام ده يضحك ويحس اني ببالغ او بعطي الامر اكثر من حجمه او بعطي اللي انا بعمله اهميه اكثر من اللي يستحقها

وده هيتوقف علي النظره المختلفه لكل منا عما يفعله

فانا اعطي للي انا عايزه اعمله في المدونه قيمه عظيمه عندي علي اساس انه طريقه جهاديه ودعويه لا تقل اهميه عن اللي بيحاربوا في ارض المعركه

اما اللي شايف اللي بيعمله مش مهم قوي فلا يصح ان يفعله في رمضان او الوفت اللي بيكتب فيه يكون اولي انه يعمل فيه عباده من العبادات وساعتها انا رايي انه يبطله في كل الشهور لان برضه في عباده علي طول

اما لو حد شايف ان ده جهاد ودعوه في الشهور الاخري فازاي يبطله في رمضان مفيش في الاسلام حاجه اسمها نشتغل بره رمضان ولما ييجي رمضان نتفرغ للعباده بالعكس في رمضان المفروض ان الجهاد والدعوه يزيدوا معظم الحروب المهمه في الاسلام كانت في رمضان والرسول والقواد من بعده ماحدش قال فيهم ان ده رمضان فنكتفي بالتعبد فقط

الدين بتاعنا عمره ماكان دين حد يفضل يصلي ويصوم فيه فقط بالعكس ديننا بيأمرنا بأن احنا نختلط بالناس ولانكف عن الدعوه في اي وقت بالعكس الدعوه والجهاد هم اعظم الاعمال الي الله والرجل العابد اللي ربنا طلب الملائكه ان يبدؤا به في العذاب وذلك لانه كان انقطع للعباده وترك الدعوه لله والامر بالمعروف والنهي عن المنكر

في مدونات كتير انا كنت بستفيد منها جدا كان في حاجات بتعلمها منهم ماكنتش بقدر اتعلمها في اي وقت تاني وفجأه لقيتهم بيقرروا التوقف طب ليه؟ الاولي انكم تفيدوا الاخرين في رمضان اكثر من اي وقت اخر

عوضا عن التوقف كان المفروض يبقي فيه تفكير في كيفية تطوير المدونه بحيث تصبح اكثر افاده وفاعليه واكثر تعليما للمسلمين بامور دينهم وتاريخ دينهم اللي مفيش حد يعرفه

يعني بدل ما واحد يفكر يوقف المدونه كان يفكر مثلا انه يعمل سلسله عن تاريخ ابطال المسلمين وابطال الفتوحات الاسلاميه اللي مفيش حد عارفهم وتخيل الثواب اللي ممكن تاخذه

وياريت ماحدش ينسي احاديث الرسول عن اهميةطلب العلم وان فضل العالم علي العابد كفضل القمر علي سائر الكواكب وان العلماء ورثة الانبياء وانتم اخترتم بدل من تكونوا علماء يفيدوا غيرهم بجانب العباده ايضا ان تكونوا عباد فقط ودي خساره كبيره جدا

واللي بشوف ان المدونه دي بيتكلم فيها وخلاص كانه بياذن في مالطه ومفيش حد هيسمع اللي بيقولوه فيكون الاحسن انه يوقفها في رمضان فانا هقوله رايي

انا لما بكتب في المدونه مش بيهمني الكلام ده هيوصل لكل الناس ولا لآ انا اهم حاجه اني اعمل اللي عليا في الحاجه اللي ربنا قدرني عليها من غير ما احسب النتيجه

انا علي السعي وليس علي ادراك النجاح

اهم ما افعله هو ان اخلص لله في عملي وان اصحح نيتي بان كل ما افعله لخدمة الدين ثم اترك الله ياتي بالنتيجه

انا شايفه ان باخلاصي للي بعمله ربنا هيكرمني فيه وتبقي منه نتيجه تخدم الدين

لما ساعات افكر في عدم اهمية اللي بعمله واني كاني بأذن في مالطه وان الاولي مثلا ان في رمضان اترك اللي بعمله واعمل اي عباده

بفتكر ان ده جهاد وطريق دعوي وانه مهما كان صغير ومش مهم دلوقتي فانا ماعرفش هيبقي في المستقبل

وبفتكر دايما ناجي العلي اللي هو ماكانش افكاره اسلاميه الا انه كام مؤمن بقضيته وكان في بدايته بيكتب علي جدران المخيمات لان ماكانش في وسيله اخري ينشر بيها اعماله وساعتها ما قالش مين اللي هيشوفها ولا ايه اهميتها انما هو عمل اللي عليه فربنا كرمه بان غسان كنفاني سمع عنه مره فارسله ونشر اعماله

علي الرغم من اختلافي مع الاثنين الا اني احترم الكفاح وعدم اليأس في اي انسان مهما كانت درجة اختلافي معه

الامام حسن البنا بدأ طريق الدعوه بانه كان بيكتب ورق فيه نصائح وكان بيتركها تحت ابواب المحلات اللي اصحابها كانوا بيرتكبوا أخطاء وده عشان مايسببش احراج لهم لانه اصغر منهم

انا لما بفكر في الامثله دي وبالطريقه دي بستعيد ثقتي في اللي بعمله وارجع احب اني اكتب ومافكرش اني اوقف التدوين لا في رمضان ولا غيره

وبقول انا هفضل اكتب علي جدران النت وبأذن الله مش هيأس

ارجو الا يغضب احد من كلامي وان شعر احد ان كلامي كان صادم فوالله لم اقصد ان اجرح احد وعندما تكلمت لم اكن اقصد احد بالتحديد وبالطبع لم اقصد ان اقول اني افضل من احد بل اني الاقل عشان كده اتضايقت ان ناس افضل مني كثيرا توقفوا

انا ماعرفش ظروف كل اللي وقفوا التدوين ولكن انا بتكلم علي المدونيين اللي مش مقتنعيين باللي بيعملوه تمام الاقتناع وشايفين انه لا يرتقي لمستوي الدعوه والجهاد فخساره يضيعوا وقت رمضان عليه

يهمني ارائكم جدا لاني عايزه اعرف هدفكم ايه من التدوين

رمضان كريم