المعذبون في الارض

طبعا قريتوا الخبر الجميل بتاع تعذيب الشابان المصريان في الكويت برمى مياة نار علي جسمهم

ياتري كان ايه احساسكم وانتم شايفين صورهم

ايه رايكم؟عارفين انا بقيت بحس ان المصريين دول متاحين للاهانه في كل مكان

بيان هام: الى اعزائنا العملاء

اللي متضايق وعايز يطلع قرفه في حد, مفيش مشاكل يقولنا واحنا هنريحه علي الاخر وهنبعتله اتنين مصريين بفش غله علي راحته

,

اللي متخانق مع مراته والعيال مطلعين عينه برضه مفيش مشاكل هنشوفله برضه اتنين تلاته مصريين ويعيش حياته ومحدش هيقوله حاجه।

اللى كاره نفسه وشكله مريض نفسي عنده ساديه وده مرض بعيد عنكم بيخلي الانسان ده يحب تعذيب الناس,برضه مايزعلش نفسه طلبه عندنا اتنين مصريين في الزنزانه وصلحه।।

عزيزي العميل متقلقش طلبك هيوصلك لحد عندك وعشان تعرف مدى جديتنا روح اقسام الشرطه في مصر نفسها عشان تشوف اد ايه الطلبات بتوصل بمنتهى السرعه وعندك مثلا عماد الكبير او لو اتهورت شويه والزبون مات, عندك اللى ماتوا الاسبوع اللى فات ,واحد منهم اترمي من البلكونه وعادي جدا ولا حد هيقدر يعمل حاجه

ولازم نطمن اعزائنا العملاء بان الخدمه لغير المصريين متوفره هنا او في بلادكم العربيه او اوروبا نفسها واسال

هند الفاسي الامير تركى ا قسام الشرطه الكويتيه الحكومه الايطليه(قضية ابو عمر الامام المصري) الحكومه الكويتيه نفسها لو حبيت تهين اي دبلومسيين وولا يهمك لاحصانه ولا كرامة البلد وعادي عيش حياتك

عزيزنا العميل احنا اهم حاجه عندنا راحتك ومتخافش لا من مسئوليه قضائيه ولا من ازمه دبلوماسية متقلقش شوية شجب علي ادانه علي احتجاجات فارغه وكله هيتنسي وكله هيبقي في السليم

علي فكره احنا برضه عندنا بنات لوعايز تتجوز يومين وتمتع نفسك ومفيش واحده توجع دماغك مش هتلاقي حد يسالك بتعمل ايه او يحاسبك علي حاجه

اصلهم كتير قوي شباب وبنات بالهبل وبصراحه عايزين نخلص و احلي حاجه فيهم انهم مبيفتحوش بقهم ولا يعترضوا علي اي حاجه ومستسلمين لاي حاجه بتحصلهم فيستاهلوا! هما اللي جايبينوا لنفسهم ولا ايه رايك ؟

صدقنى مش هتلاقى الخدمه دى في اي دوله تانيه

ومش هتقدر تغمض عينيك

امضاء الحكومه المصريه

ملحوظه اللى يهون علي اهله يعذبوه ويرموه من البلكونات يبقي حق علي الغريب انه يرش مياة نار

واللهى هانت عليه نفسه وماثارش علي اللي بيحصله يبقي حق علي القريب والغريب يعيشوه في نار