اسماء و د عصام

يمكن غريب انى اختار الاسم ده للبوست لبنت ورجل ميعرفونيش خالص بس الى حدما انا عارفاهم و اظن واضح مين اللى انا اقصدهم


دعصام العريان وبنته اسماء صاحبة مدونة هعيش واتحدى احزانى


اسماء متعرفنيش خالص لانى لسة عاملة المدونة وحتى ماراسلتهش لكن كنت متابعة المدونة بتاعتها


بيعجبني اسلوبها وكتابتها عن حياتها العائلية لان ده بيدى احساس بالقرب على الرغم من انى عمرى ما شفتها ولا كلمتها قبل كدة,


لما د عصام اعتقل للمرة الرابعه مكنتش اعرف المدونة بتاعتها وكنت قرات عنوان سخيف في صحيفة للاسف مش فاكرة اسمها ان الاخوان باعوا د عصام للحكومة عشان اعتقل لمدة طويلة واتنرفزت من الكلام الفارغ ده جدا


ولما عرفتها كان د عصام خرج من المعتقل وكانت فرحانة جدا وانا كنت فرحانة لانة اخيرا رجع لاهله بعد ماكن في حوزة غيلان الحكومة,الاسبوع اللى فات كنت مسافرة وماكنتش متابعة المدونات لأفاجأ لما ارجع ان الكلاب اخدوه تانى , انا كنت في حالة سيئة جدا وصممت انى ابدأ المدونة عشان اقدر اكلم اسماء هي وكل اللى في ظروفها عشان اقولهم ان احنا مش سايبينكم وجايز مكاني بعيد عنكم لكن كلنا معاكم , بجد انتى يااسماء وكل اللى زيك اقوى منهم واصلب منهم لان اللي انتوا فيه مايستحملهوش الا ابطال وانتم فعلا كده


انا مش هواسيكم واقول معلهش وصعبانين عليا قوي وكلام الشفقة ده لان انتم اعلي من الشفقة , اعلى من الحياة نفسها واعلي من الموت نفسه لان انتم قدمتوا ارواحكم عشان قضية امنتم بيها والموت مابقاش يقدر يخوفكم.انا مبهوره بيكم ونفسي ابقي زيكم بس عارفه ان اللى انتم فيه ده صعب ومش هيستحمله الا اللى عنده ارادتكم وتصميمكم علي الحق.
واخيراوليس اخرا انا واثقه يا اسماء انك باذن الله هتقدري تعيشي وتتحدى احزانك,