Friday, November 23, 2007

عندما تزدحم الافكار .......يظهر التاج


كانت هناك أشياء كثيره مهمه أريد الحديث عنها



ولكني وجدت دوامه من الافكار تعصف برأسي لدرجة أني فقدت التركيز الذي يؤهلني لكتابة شئ واحد



فقررت الرد علي التاجين اللذان كانا قد اهداهما الي عبد الرحمن عياش و بنات أفكاري






التاج الاول من بنات أفكاري






قالوا لك تختار عصر من عصور مصر عشان تعيش فيها تختار أي عصر وفي عهد أي حاكم؟اشمعني؟



العصر اللي العز بن عبد السلام جاء الي مصر بصراحه مش فاكره مين الحاكم اللي كان موجود بس الشيخ بن عبد السلام علمه الادب فيمكن عشان مش لاقيه حد وقف لحاكم مصري زي الشيخ بن عبد السلام فكان نفسي أشوف المعجزه دي









أول أولويه في حياتك عيلتك ولا شغلك ولا أصحابك؟



لكل مقام مقال ماينفعش أضيع حق أي حاجه علي حساب الاخري।



أهم أولويه عندي هي اني اعمل حاجه عظيمه للاسلام يعني ممكن ده يعتبر من الشغل






أكثر حاجه بتحبها في رمضان


ليل رمضان الفرحه في الشوارع وقت السحور


ان في حاجه أنا ببقي حاساها وعايشه فيها وواثقه أن كل الناس زيي





أوصف أجمل افطار ممكن تفطره


حسب الحاجه اللي نفسي اكلها وقتها


لو أنت حاكم علي مجموعه من الافراد هتكون حاكم عادل ؟طب هتتأكد ازاي انك عادل؟


أعوذ بالله أنا مستحيل أطلب الحكم أو أسعي اليه أو أسمح لحد انه يدبسني فيه


ل
ايه ترتيبات لفرح ممكن تحضره؟


حسب حالتي النفسيه والمزاجيه ساعات ببقي عايزه فرح هادئ وساعات ببقي عايزه فرح صاخب


بس بتمني احضر فرح اسلامي لاني عمري ما حضرت فرح اسلامي قبل كده


بتراعي كلام الناس والقيل والقال؟ولو اه أو لأ تقول ليه؟


أنا مش بكره حاجه في حياتي الا الموضوع ده أنا حره وبجد الناس تولع يقولوا اللي هم عايزينه مادام مش بعمل حاجه غلط اللي هيهتم بكلام الناس مش هيعيش حياته اللي عايز يقول عليا حاجه يقول بجد ولا في دماغي اصلا


صحيت من النوم ملقتش الموبايل ولا الكاميرا الديجيتال ولا الكمبيوتر ورجعنا لعصر الحمام الزاجل والحصنه هتكون سعيد؟


ياريييييييييييييييييييييييت أنا بعشق العصور دي انا دايما بحب أقرأ حاجات عن الحياه العربيه القديمه منتهي الرومانسيه الحياه مع الطبيعه وسط الصحراء والتنقل بالخيل اللي أنا بعشقه بجد أهيم حبا بالكائن الجميل ده حتي الرجال بيبقي شكلهم رجولي أكثر وهم راكبين الخيل بجد الحياه دي رائعه مليانه خيال وشعر و رومانسيه


حتي الحروب كانت البطولات زمان فيها بتظهر أكثر لما كانت بالخيول وكان بيبقي فيه مبارزه ققبل المعركه بجد شجاعه وبطوله من الجانبين حياه رائعه


السعاده هي؟


حد يقوللي لأن أنا نسيت الاحساس ده من زمن أنا مش عارفه أبقي سعيده أنا عندي أحلام وللأسف مش عارفه أحققها فده مخليني فاقده الاحساس بالسعاده بس الي حدما أجمل حاجه في الدنيا دي الجهاد في سبيل الله بكل الطرق خدمة الاسلام دي هي الحاجه الوحيده اللي بتسعدني بجد وفي نفس الوقت بتبقي أكثر أسباب تعاستي لأني مش عارفه أوصل للي أنا عايزاه أدعوا لي


عندك أمل ايه أسبابه؟


مش عارفه ولو هيبقي عندي يبقي السبب الثقه في الله طبعا وأني لو احتجت حاجه هقوم أصلي ولا أدعي أو أقرأ قران فأحس ان ربنا جنبي فأحس بأمل


لما بتحب تهرب من كل شئ بتروح فين؟


كلما اذداد الواقع قسوه اذددت أنا هروبا في خيالي وأحلامي حتي أصبحت في أحيان كثيره منفصله عن كل حاجه الا تفكيري في ديني


امتي أول مره اخدت فيها نفس طويل وقلت ياااااااااااه أنا كبرت؟


شكلي كبير وعقلي في مواقف كتيره كبير وناضج ولكن روحي بالفعل صغيره ودايما بحس أني مازلت طفله يعني مثلا مش عايزه أتعلم طبخ عشان شايفه نفسي صغيره ولسه بدري علي حاجه زي دي ده فضلا عن كراهيتي للمطبخ وفي أوقات كتيره ماما بتقولي فيها أنا مش مصدقه أنك عندك 20سنه ولما بفكر اني عايزه أتجوز بيبقي بسبب الرومانسيه اللي أنا فيها وأني بالفعل مؤمنه بفكرة اني أقابل فتي أحلامي اللي باذن الله مش هتنازل عنه لأقبل بأي حد لمجرد ان ممكن حد يشوف اني كبرت


بتشرب سجاير؟وايه شعورك لما تشوف ست أو راجل بيشرب سجاير؟ليه؟


ولا بطيق ريحتها مع ان كان في أوقات بتعدي عليا كان نفسي أجربها وفي مره واحده أيام الجاهليه بتاعتي جربت وشربت شيشه عشان كنت هموت وأجرب وفضلت أكح وكانت حالتي زفت بس الحمدلله ربنا هداني بعدها عشان كده بدعي لأي حد بالهدايه لما بشوفه بيشرب سجاير


بتعرف ايدك اليمين من الشمال ازاي؟


!!!!!!!!!!!!!!!!!!!!!!!!


ايه اكتر اله موسيقيه بتحبها؟



م كمان , عود و 
الذوق والنخوه انعدموا؟


ساعات بحس بان الذوق اتعدم وساعات لأ بس بجد اللي بحس انه اتعدم الغيره والرجوله والنخوه بجد انا مش عارفه ايه اللي حصل


ايه الحاجه اللي لو حصلت هتبقي سعيد قوي؟


أحقق حلمي بجد هطير من الفرحه


وأني أقابل فتي أحلامي بطريقه رومانسيه وخياليه ومش متوقعه


تحب يبقي عندك أرض زراعيه ولا أجنس عربيات ولا كام عماره ولا فلوس في البنك؟


الفلوس عشان أسافر بره ده من أكثر الحاجات اللي بحلم بيها
اجنس العربيات عشان بعشق العربيات وبالذات لو سبور تبقي قشطه



البحر ولا النيل؟


البحر طبعا مفيش حاجه رومانسيه ومتوحشه في نفس الوقت قد البحر انا النيل هائ ورتيب


مركب ولا طياره؟


طبعا مركب مع اني بخاف من البحر بس بحبه


مجنون ولا عاقل؟


مجنون ساعات بيبقي فيه جنون حلو


تقرأ كتاب ولا تتفرج علي فيلم؟


بعشق القراءه بس فيه بعض الافلام تحفه مثلا زي أساطير الخريف بموت في الفيلم ده


تمرر التاج لمين؟


مروه حلم الحريه,شيماء شقاوة شعب,حزين, انكسارات, اليعقوبي, عصفور المدينه, دعوة الفردوس, أبوزياد الفاتح, أسماء ياسر, أسماء همسة قلم ,بنات أفكاري ,طال الليل, مهند ,أبو مفراح , طارق قاسم , الجيزاوي , محمود شوية أفكار , محمد عبد الجليل


كل أصحابي اللي بيزوروا المدونه عشان كده أنا نسيت ناس أنا أسفه





تاج عبد الرحمن مش لاقياه عنده لأنه كان قبل رمضان كنت هموت وأرد عليه يبقي ليا تاج تاني عندك يا عبد الرحمن





Monday, November 12, 2007

لقد قتلوا الحلم فيهم



















تري فيم كان يفكر وهو يمشي متثاقلا خارجا من بيته المتواضع في تلك القريه المنسيه التي يزخر بامثالها ريفنا الحبيب من شمال مصر الي جنوبها


تري أكان يفكر في امه العجوز وابيه الشيخ الذي يضطر الي تركهما في كبرهما بعد أن ساءت الظروف ولم يعد هناك ما يستطيع ان يقيم بهما اودهما هما واخوته فضلا عن التفكير في ان يصبح له بيت وزوجه واطفال كما يتمني


لا أعرف بالضبط فيما كان يفكر ولكنك تستطيع ان تري نفس النظره الساهمه والوجه الحزين علي وجه جاره الذي خرج هو الاخر لينطلقا معا الي مجهول لا يعرفان عنه شئ وقد ترك هو الاخر زوجه واطفال ليس لهم الا الله




بالفعل لا أعرف بالضبط فيما كانا يفكران ولكن من السهل ان تتوقع ما كان فيه هذين من خوف ورعب وترقب لمجهول يتوقعان للاسف دائما انه ليس سعيد



من الغريب ان نفس النظره ونفس الكابه ارتسمت علي وجوه مائه واربعه وثمانين اخرين من شباب ورجال مصر من قريتي شدوه وكفر العرب بنفس الظروف خرجوا لنفس الهدف تاركين ورائهم أهليهم وقد أخذوا معهم كل ما يملكونه من مال في سبيل رحله يتوهون فيها وراء سراب تحقيق ما قد يئسوا منه في بلدهم




أنا أعتقد أنهم كانوا يعرفون أن احتمال ضياعهم في ظلمات البحر وارده وبقوه وهم يسمعون عن أنباء أبناء الدول الافريقيه المتنازعه الذين يغرقون كل يوم في بحر لا يرحم في سبيل وهم لا يتحقق




ومع ذلك انطلقوا




لقد قتل هؤلاء مليون مره قبل ان يلتهمهم البحر بل ان البحر كان أرحم بهم فهو عندما قتلهم لم يعذبهم ورزقهم باذن الله شهاده تعوضهم عما حدث لهم أما في بلدنا الجميله فكانوا يقتلون في اليوم الاف المرات



فتحولوا



لجثث تمشي, جثث فقدت الحلم وضاع منهم الامل حيث وجدوه مصلوبا علي يافطات الحزب الوطني واستمر يا مبارك نحن معك



لقد فقدوا كل شئ ومع ذلك لم يثوروا وفضلوا رحله للمجهول بلا هدف وبلا يقين في النجاه علي أن يأخذوا حقهم في بلادهم ويستردوا بلادهم من الحزب الوثني المغتصب


لماذا فضلوا الهروب ماداموا هم في كل الاحوال لم يعد لديهم ما يخسرونه؟ عجزت عن الحصول علي اجابه ولكن للاسف هذا ما يراهن عليه مغتصب البلاد أن أهلها سيفضلون الهروب عن المواجهه


وماذا جنوه من شيوخ السلطه غير أنهم اعتبروهم ليسوا بشهداء علي أساس أنهم طامعين تركوا الجنان والخيروالملك والسلطه وفضلوا أن يكونوا عشاء دسم للأسماك

وماذا جنوه غير القبض علي صاحب وكالة السفريات الذي سفرهم وتركوا المجرم الاكبر الذي أوصلهم لما هم فيه


حسبي الله ونعم الوكيل


بل هم شهداء غصبا عن من أسمي نفسه رئيس ولا أطيق ان أذكر اسمه


وغصبا عن زبانية الفساد حوله



وغصبا عن شيوخ باعوا دينهم بدنياهم فأتمني لهم لهب جهنم


وعلي الصعيد الاخر



قد أقام تامر العبد خريج ادارة اعمال فندق خاص للكلاب الفاخره في المنصوريه فيه حمامات سباحه وحدائق للترفيه عن الكلاب حتي لا يصابوا بالاكتئاب والليله بخمس وأربعون جنيها فقط الخبر في ملحق النهارده اجازه بأخبار اليوم ليوم السبت الماضي


بسرعه عشان الفندق كومبليت



بالاضافه الي انه في فرصه ذهبيه للراغبات في التألق علي شواطئ مارينا هناك مايوهات بكيني تباع بأرقي مولات القاهره المايوه الواحد بخمس عشرة ألف جنيه الرقم صحيح والخبر كان في الاهرام يا بلاااااااااااااااااش



بالله عليكم لا يمكن أن نظل صامتين في ظل هذه الماساه يجب ان نفعل لهم شئ ونحاول جمع تبرعات لأهليهم الذين فقدوا العائل والاموال وكل شئ






لقد عرضت الامر علي البعض فقالوا لي أن هناك من هم أولي منهم ولست أعرف أحد أولي من الذين في هذه الظروف






بالله عليكم هذه نكبه وطنيه أن يغرق أخواتنا في غياهب البحر ثم لا نساعد أهليه






أرجوكم نريد أن نساعدهم ونقف بجانبهم فلنطلق حمله لجمع التبرعات لهم أو أي شئ ترونه مناسبا المهم ألا نقف صامتين نري المشاهد الجنائزيه بعينين خرساوتين وقلب لا يشعر












لا أعرف ماذا أقول فقد ضاق الصدر وعجز اللسان ولم ينطلق القلم وأسكتت أصوات الحق وأصبح ضجيج الظلم فوق كل احتمال